الورد يجرح ...!

ليا بحر جيتك معي جرح وصكوك
والموج يلطم دفتين السفينة

ماني ولد عبده ولا ني بـ مملوك
ولاني من اللي يرتضي فــ الغبينه

كرّمت وجهي عن خطا كل صعلوك
وشيّمت نفسي عن خطات اللعينه

احدٍ ينام ليابغى النوم فــ البوك
واحدٍ غزت صكّات بقعا جبينه

ياباب .. ياللي من ورى نوف صكّوك
ومن خلفك المزلاج شدّوا يدينه

بلغ سلامي لأريش العين يابوك
قلّه ترى قلبي تزايد حنينه

وقله رصيدك فــ الحشا شيّد بنوك
ارباحها في وسط صدري دفينه

وياقلب لا تشره على اللي تناسوك
حتى الولد ينكر حضن والدينه ..!

عشانهم ياما وطت رجلي الشوك
وفي وسط كفي شلت روحي رهينه

الورد يجرح لا خلط غصنه الشوك
والبعد راحه للنفوس الحزينه

والخام يفرق .. فيه صافي ومشروك
وكذا القصايد .. فيه هزل وسمينه