دعوه للجميع للنقاش بهذا الموضوع

دعوه للجميع للنقاش بهذا الموضوع


السلام عليكم ورحمة الله وبركاته


اسعد الله اوقاتكم بكل خير


وكل عام وانتم بخير

رمضان كريم على الجميع ..


اليوم بتناقش معاكم بموضوع صارلي فتره وانا احاول اغير مفاهيم الجميع فيه

ولكن دون جدوى ~



بقولكم موقف حصل معايا بجده في احد المنتزهات النسائيه

مره وانا ماشيه صدمت بأحد البنات هناك اللي هيا من بنات جده

وطاحت شنطتها واغراضها انا حسيت نفسي الغلطانه فنزلت وشلت شنطتها واعتذرت لها

وابتسمت بوجهي وللأمانه اخلاقها عاليه الله يحفظها

المهم رجعنا وتقابلنا صدفه ولكن كنت ماسكه اختي عشان تبغى تلعب وهيا معها طفل كمان

طبعا" البنت ابتسمت وجلسنا سوا نتكلم فقالت من وين شكلك مو من جده من هرجك يعني

قلت ايوا احزري انتي ~

قالت من مكه قلت لا قالت المدينه قلت لا .. وذكرت اغلب مدن المملكه ماعدا الرياض !!
لدرجه انها قالت من الكويت ؟!
قلت لا

قالت حيرتيني قولي من وين .. قلت نجديه من الرياض

البنت عيونها صارت كذا

قلت غريبه ليه ماجبتي طاري الرياض؟

قالت مستحيل قلت ليه ؟

قالت بصارحك بس لاتزعلين اللي نعرفه ان بنات الرياض ماعندهم اسلوب ودايم دفشات وماعندهم ثقافه !

انا ضحكت قلت ليه قابلتي بنات الرياض؟

قال لا ,, قلت طيب ليه تحكمي عليهم ؟ قالت الكل يقول واصلا" معروف هذا الشيء

قلت طيب انا ماعندي اسلوب ومو مثقفه ودفششه؟

قالت هذا اللي افجعني اسلوبك مو اسلوب وحده دفشه ! قلت لا ياروحي انا نجديه وكل بناتنا كذا اسلوبهم بس انتو ماخذين فكره غلط!

البنت اعتذرت مني ومااكذب عليكم بصراحه تضايقت ومع الوقت نسيت السالفه ..

لكن قبل يومين تطلعلي وحده من بنات جده كمان وتقول نفس الحكي ؟ وآآي؟؟!!

انا لي صاحبات بجده فسألتها امس وش نظرتك لبنت الرياض؟

قالت والله بقولك الصراحه ماعندهم اسلوب رجعت سألتها طيب انتي حكيتي معهم قالت لا

انجنيت قلت طيب ليه تحكي عليهم بكذا؟؟!

قالت يقولون !!

قالتلي البنت بقولك حاجه اللي نشوفها تلبس عباية راس نقول بدويه من اهل الرياض !

قلت اذا البعض شايف ان عباية الراس تشويه فأنتم غلطانين افتخر بهذا الشيء

والاغلبيه ومنهم بنات اعرفهم عز المعرفه اذا شافوا شباب يغازلون بالمجمعات قالوا شباب الرياض مو شايفين خير ..!

استغرب بصراحه من ردات الفعل العجيبه هذي
* اللي انا اؤمن فيه بجميع العالم ان كل منطقه فيها فئه مثقفه وفئه متوسطه وفئه معدومة الثقافه

بس ليه الحكم هذا فقط على بنات نجد؟

واللي شد انتباهي اني لما اسألهم يقولون ماعمرنا قابلنا بنت من الرياض !

طيب ليه تحكمون من البدايه ؟!

انا مو عشاني بنت الرياض احكي كذا لا

بس ليه العنصريه الزايده احنا بنات دوله وحده
وانا افتخر ببنات الغربيه والشرقيه والشماليه والجنوبيه ~

ابي وعي بهذا الموضوع لا أكثر


هذا ماعندي ~

حياكم